maine bhi sina hawa-dar bana rakkha hai

maiñ ne bhī siina havā-dār banā rakkhā hai

aañkh ko rauzan-e-dīvār banā rakkhā hai

peḌ ne rūThe hue mausam-e-gul ke ġham meñ

shāḳh ko dast-e-azā-dār banā rakkhā hai

sañg-e-ḳhvāhish kabhī dariyā ke havāle na kiye

pheñkne ke liye kohsār banā rakkhā hai

maiñ ne kāġhaz kī zirah jism pe pahnī huī hai

aur qalam haath meñ talvār banā rakkhā hai

saañs lenā bhī mire vāste nā-jā.ez hai

ḳhud ko yuuñ maiñ ne gunahgār banā rakkhā hai

vahī manzar jo idhar phailā nazar aayā thā

vahī ab jhiil ne us paar banā rakkhā hai

main ne bhi sina hawa-dar bana rakkha hai

aankh ko rauzan-e-diwar bana rakkha hai

peD ne ruThe hue mausam-e-gul ke gham mein

shaKH ko dast-e-aza-dar bana rakkha hai

sang-e-KHwahish kabhi dariya ke hawale na kiye

phenkne ke liye kohsar bana rakkha hai

main ne kaghaz ki zirah jism pe pahni hui hai

aur qalam hath mein talwar bana rakkha hai

sans lena bhi mere waste na-jaez hai

KHud ko yun main ne gunahgar bana rakkha hai

wahi manzar jo idhar phaila nazar aaya tha

wahi ab jhil ne us par bana rakkha hai