میں نے اک حرف سے آگے کبھی سوچا ہی نہ تھا

میں نے اک حرف سے آگے کبھی سوچا ہی نہ تھا

اور وہ حرف لغت میں تری لکھا ہی نہ تھا

میں نے کہنا بھی جو چاہا تو بیاں کر نہ سکی

مجھ میں لفظوں کو برتنے کا سلیقہ ہی نہ تھا

اس نے ملنے کی رہ و رسم نہ کی ترک مگر

میں ہی چپ رہ گئی اب کے وہ اکیلا ہی نہ تھا

میں تو شاعر مری سچائی دلیلیں مانگے

اس کو کیا ہو گیا وہ جھوٹ تو بولا ہی نہ تھا

میں نے اک بوند جو مانگی تو عجب قحط پڑا

خون بازاروں میں جیسے کبھی بکتا ہی نہ تھا

وہ کڑی دھوپ ہے سیلاب زدوں کے سر پر

ایسا لگتا ہے یہاں ابر تو اٹھا ہی نہ تھا

اتنے دن بعد جو آئینہ اٹھایا میں نے

اتنا دیکھا مرا چہرہ مرا اپنا ہی نہ تھا