main ro raha hun jo dil ko to bekasi ke liye

maiñ ro rahā huuñ jo dil ko to bekasī ke liye

vagar na maut to duniyā meñ hai sabhī ke liye

shab-e-firāq kī rozāna āfateñ tauba

ye imtihān to hotā kabhī kabhī ke liye

bahut sī umr miTā kar jise banāyā thā

makāñ vo jal gayā thoḌī sī raushnī ke liye

vasī.a bazm-e-jahāñ hai to ho mujhe kyā kaam

jagah milī na mirī hasrat-dilī ke liye

ye aur dāman-e-qātil hai chhūT jā.egā

lahū meñ josh to barsoñ se thā isī ke liye

na aañkh band karūñ maiñ to kyā karūñ yārab

vo aa rahe haiñ tamāshā-e-jāñ-kanī ke liye

bulā ke mujh ko nikālā hai apnī mahfil se

vo nekiyāñ nahīñ achchhī haiñ jo ho badī ke liye

qafas meñ aaj tamāshā-e-ġham hai qābil-e-dīd

taḌap rahā huuñ maiñ sayyād kī ḳhushī ke liye

tamām ho ga.e ham ik nigāh-e-qātil se

rageñ gale kī taḌaptī rahīñ chhurī ke liye

faroġh-e-husn baḌhā dil kī be-navā.ī se

faqīr ho gayā shān-e-tavañgarī ke liye

qafas meñ chup na hoñ to kyā karūñ ki ye qaidī

na dostī ke liye hai na dushmanī ke liye

tamām bazm meñ chhāyā huā hai sannāTā

chhuḌā thā qissa-e-dil un kī dil-lagī ke liye

shikāyat-e-chaman-e-dahr kyā karūñ 'sāqib'

havā ḳhilāf hai lekin kisī kisī ke liye

main ro raha hun jo dil ko to bekasi ke liye

wagar na maut to duniya mein hai sabhi ke liye

shab-e-firaq ki rozana aafaten tauba

ye imtihan to hota kabhi kabhi ke liye

bahut si umr miTa kar jise banaya tha

makan wo jal gaya thoDi si raushni ke liye

wasia bazm-e-jahan hai to ho mujhe kya kaam

jagah mili na meri hasrat-dili ke liye

ye aur daman-e-qatil hai chhuT jaega

lahu mein josh to barson se tha isi ke liye

na aankh band karun main to kya karun yarab

wo aa rahe hain tamasha-e-jaan-kani ke liye

bula ke mujh ko nikala hai apni mahfil se

wo nekiyan nahin achchhi hain jo ho badi ke liye

qafas mein aaj tamasha-e-gham hai qabil-e-did

taDap raha hun main sayyaad ki KHushi ke liye

tamam ho gae hum ek nigah-e-qatil se

ragen gale ki taDapti rahin chhuri ke liye

farogh-e-husn baDha dil ki be-nawai se

faqir ho gaya shan-e-tawangari ke liye

qafas mein chup na hon to kya karun ki ye qaidi

na dosti ke liye hai na dushmani ke liye

tamam bazm mein chhaya hua hai sannaTa

chhuDa tha qissa-e-dil un ki dil-lagi ke liye

shikayat-e-chaman-e-dahr kya karun 'saqib'

hawa KHilaf hai lekin kisi kisi ke liye