main shoala-e-izhaar hun kotah hun qad tak

maiñ sho.ala-e-iz.hār huuñ kotāh huuñ qad tak

vus.at mirī dekho to hai dīvār-e-abad tak

māhaul meñ sab gholte haiñ apnī siyāhī

ruḳh ek hī tasvīr ke haiñ nek se bad tak

kuchh fāsle aise haiñ jo tai ho nahīñ sakte

jo log ki bhaTke haiñ vo bhaTkeñge abad tak

kab tak koī kartā phire kirnoñ kī gadā.ī

zulmat kī kaḌī dhuup to Dastī hai abad tak

yuuñ rūThe muqaddar ki koī kaam na ban paa.e

yuuñ TuuTe sahārā koī pahuñche na madad tak

ab bhī tire nazdīk muvahhid nahīñ 'fāriġh'

iqrār kiyā hai tirā inkār kī had tak

main shoala-e-izhaar hun kotah hun qad tak

wusat meri dekho to hai diwar-e-abad tak

mahaul mein sab gholte hain apni siyahi

ruKH ek hi taswir ke hain nek se bad tak

kuchh fasle aise hain jo tai ho nahin sakte

jo log ki bhaTke hain wo bhaTkenge abad tak

kab tak koi karta phire kirnon ki gadai

zulmat ki kaDi dhup to Dasti hai abad tak

yun ruThe muqaddar ki koi kaam na ban pae

yun TuTe sahaara koi pahunche na madad tak

ab bhi tere nazdik muwahhid nahin 'farigh'

iqrar kiya hai tera inkar ki had tak