main tere pas hun mujhse ye kah raha koi hai

maiñ tere paas huuñ mujh se ye kah rahā koī hai

tamām shab mirī āñkhoñ meñ jāgtā koī hai

diyā umiid kā bujhtā hai jaltī āñkhoñ meñ

kisī ke lab pe mire vāste duā koī hai

purānī bātoñ kī yādeñ bhikāriyoñ kī tarah

savāl kartī haiñ aivān-e-dil pe kyā koī hai

gumāñ guzartā hai hote hue na hone kā

tirī nigāh meñ jaadū magar nayā koī hai

ye ḳhvāb kā hai safar maiñ huuñ ḳhvāb-rū kī tarah

na ibtidā hī thī kuchh aur na intihā koī hai

na vo fazā na vo chashme na vādiyāñ na vo log

magar ye vahm mirī raah dekhtā koī hai

shikasta-dil tū use chhoḌ kar na jā 'ġhāfil'

ki tere saaz meñ muzmar abhī sadā koī hai

main tere pas hun mujh se ye kah raha koi hai

tamam shab meri aankhon mein jagta koi hai

diya umid ka bujhta hai jalti aankhon mein

kisi ke lab pe mere waste dua koi hai

purani baaton ki yaaden bhikariyon ki tarah

sawal karti hain aiwan-e-dil pe kya koi hai

guman guzarta hai hote hue na hone ka

teri nigah mein jadu magar naya koi hai

ye KHwab ka hai safar main hun KHwab-ru ki tarah

na ibtida hi thi kuchh aur na intiha koi hai

na wo faza na wo chashme na wadiyan na wo log

magar ye wahm meri rah dekhta koi hai

shikasta-dil tu use chhoD kar na ja 'ghafil'

ki tere saz mein muzmar abhi sada koi hai