main use tujhse mila deta magar dil mere

maiñ use tujh se milā detā magar dil mere

mere kuchh kaam nahīñ aa.e vasā.il mere

vo junūñ-ḳhez masāfat thī ki dekhā hī nahīñ

umr bhar paañv se lipTī rahī manzil mere

tū milā hai to nikal aa.e haiñ dushman saare

vaqt kis kis ko uThā laayā muqābil mere

abr-e-girya ne vo tūfān uThā.e ab ke

mere dariyāoñ ko kam paḌ ga.e sāhil mere

jitnā hal kartā huuñ utnā hī bigaḌ jaate haiñ

tū nahīñ jāntā ai dost masā.il mere

ishq meñ haar ke ma.anī hī badal jaate haiñ

tujh ko mālūm nahīñ hai abhī qātil mere

be-ant safar merā muqaddar hai 'salīm'

mujh meñ tai kartā hai ye kaun marāhil mere

main use tujh se mila deta magar dil mere

mere kuchh kaam nahin aae wasail mere

wo junun-KHez masafat thi ki dekha hi nahin

umr bhar panw se lipTi rahi manzil mere

tu mila hai to nikal aae hain dushman sare

waqt kis kis ko uTha laya muqabil mere

abr-e-girya ne wo tufan uThae ab ke

mere dariyaon ko kam paD gae sahil mere

jitna hal karta hun utna hi bigaD jate hain

tu nahin jaanta ai dost masail mere

ishq mein haar ke mani hi badal jate hain

tujh ko malum nahin hai abhi qatil mere

be-ant safar mera muqaddar hai 'salim'

mujh mein tai karta hai ye kaun marahil mere