majaz kaisa kahan haqiqat abhi tujhe kuchh KHabar nahin hai

majāz kaisā kahāñ haqīqat abhī tujhe kuchh ḳhabar nahīñ hai

ye sab hai ik ḳhvāb kī sī hālat jo dekhtā hai sahar nahīñ hai

shamīm-e-gulshan nasīm-e-sahrā shuā-e-ḳhurshīd mauj-e-dariyā

har ek garm-e-safar hai in meñ merā koī ham-safar nahīñ hai

nazar meñ vo gul samā gayā hai tamām hastī pe chhā gayā hai

chaman meñ huuñ yā qafas meñ huuñ maiñ mujhe ab is kī ḳhabar nahīñ hai

chamak damak par miTā huā hai ye bāġhbāñ tujhko kyā huā hai

fareb-e-shabnam meñ mubtalā hai chaman kī ab tak ḳhabar nahīñ hai

ye mujh se sun le to rāz-e-pinhāñ salāmtī ḳhud hai dushman-e-jāñ

kahāñ se rāh-rau meñ zindagī ho ki raah jab pur-ḳhatar nahīñ hai

maiñ sar se pā tak huuñ mai-parastī tamām shorish tamām mastī

khulā hai mujh par ye rāz-e-hastī ki mujh ko kuchh bhī ḳhabar nahīñ hai

havā ko mauj-e-sharāb kar de fazā ko mast o ḳharāb kar de

ye zindagī ko shabāb kar de nazar tumhārī nazar nahīñ hai

paḌā hai kyā us ke dar pe 'asġhar' vo shoḳh maa.il hai imtihāñ par

subūt de zindagī kā mar kar niyāz ab kārgar nahīñ hai

majaz kaisa kahan haqiqat abhi tujhe kuchh KHabar nahin hai

ye sab hai ek KHwab ki si haalat jo dekhta hai sahar nahin hai

shamim-e-gulshan nasim-e-sahra shua-e-KHurshid mauj-e-dariya

har ek garm-e-safar hai in mein mera koi ham-safar nahin hai

nazar mein wo gul sama gaya hai tamam hasti pe chha gaya hai

chaman mein hun ya qafas mein hun main mujhe ab is ki KHabar nahin hai

chamak damak par miTa hua hai ye baghban tujhko kya hua hai

fareb-e-shabnam mein mubtala hai chaman ki ab tak KHabar nahin hai

ye mujh se sun le to raaz-e-pinhan salamti KHud hai dushman-e-jaan

kahan se rah-rau mein zindagi ho ki rah jab pur-KHatar nahin hai

main sar se pa tak hun mai-parasti tamam shorish tamam masti

khula hai mujh par ye raaz-e-hasti ki mujh ko kuchh bhi KHabar nahin hai

hawa ko mauj-e-sharab kar de faza ko mast o KHarab kar de

ye zindagi ko shabab kar de nazar tumhaari nazar nahin hai

paDa hai kya us ke dar pe 'asghar' wo shoKH mail hai imtihan par

subut de zindagi ka mar kar niyaz ab kargar nahin hai