makr-o-fareb-o-kizb ke qail nahin rahe

makr-o-fareb-o-kizb ke qaa.il nahīñ rahe

ham zindagī kī dauḌ meñ shāmil nahīñ rahe

maiñ rāh-e-zindagī meñ unheñ chhoḌtā gayā

jo log e'tibār ke qābil nahīñ rahe

ġhaddār ham ko kahte haiñ jo un se ye kaho

ham apne rahnumāoñ ke qātil nahīñ rahe

jab vaqt aa paḌā to kaTāyā hai sar magar

ham zindagī meñ hāmī-e-bātil nahīñ rahe

ab dil ko ḳhvāhishāt se raġhbat nahīñ rahī

ab apnī zindagī meñ masā.il nahīñ rahe

pesh-e-nazar mafād hai īsār hai kahāñ

logoñ meñ ab dimāġh to haiñ dil nahīñ rahe

'ash.har' rahā unhī se zamāna ye bā-ḳhabar

jo log apne aap se ġhāfil nahīñ rahe

makr-o-fareb-o-kizb ke qail nahin rahe

hum zindagi ki dauD mein shamil nahin rahe

main rah-e-zindagi mein unhen chhoDta gaya

jo log e'tibar ke qabil nahin rahe

ghaddar hum ko kahte hain jo un se ye kaho

hum apne rahnumaon ke qatil nahin rahe

jab waqt aa paDa to kaTaya hai sar magar

hum zindagi mein hami-e-baatil nahin rahe

ab dil ko KHwahishat se raghbat nahin rahi

ab apni zindagi mein masail nahin rahe

pesh-e-nazar mafad hai isar hai kahan

logon mein ab dimagh to hain dil nahin rahe

'ashhar' raha unhi se zamana ye ba-KHabar

jo log apne aap se ghafil nahin rahe