mal KHun-e-jigar mera hathon se hina samjhe

mal ḳhūn-e-jigar merā hāthoñ se hinā samjhe

maiñ aur to kyā kosūñ par tum se ḳhudā samjhe

samjhāne kī jo bāteñ kiiñ maiñ ne dilā tujh se

ai aql kī dushman so terī to balā samjhe

dil meñ mire chuTkī lī aisī hai ki dard uTThā

ma.aqūl che ḳhush ai vaah aap is ko adā samjhe

ai bū-lahab-e-naḳhvat sīdhe haiñ agar sach-much

to aaj se sāhab ko ham apnā chachā samjhe

sāhab ne na kī yaarī vahshat se parī se to

ai shaiḳh-e-junūñ tum ko ham ḳhvāja-sarā samjhe

hañgāma-e-mahshar bhī gar sāmne aayā to

us ko bhī tamāshā.ī ek saañg nayā samjhe

vo dasht-e-mohabbat meñ rakkhe qadam ai 'inshā'

sar apne ko aage hī jo tan se judā samjhe

mal KHun-e-jigar mera hathon se hina samjhe

main aur to kya kosun par tum se KHuda samjhe

samjhane ki jo baaten kin main ne dila tujh se

ai aql ki dushman so teri to bala samjhe

dil mein mere chuTki li aisi hai ki dard uTTha

maqul che KHush ai wah aap is ko ada samjhe

ai bu-lahab-e-naKHwat sidhe hain agar sach-much

to aaj se sahab ko hum apna chacha samjhe

sahab ne na ki yari wahshat se pari se to

ai shaiKH-e-junun tum ko hum KHwaja-sara samjhe

hangama-e-mahshar bhi gar samne aaya to

us ko bhi tamashai ek sang naya samjhe

wo dasht-e-mohabbat mein rakkhe qadam ai 'insha'

sar apne ko aage hi jo tan se juda samjhe