maqtal mein aaj hausla dil ka nikal gaya

maqtal meñ aaj hausla dil kā nikal gayā

sab apne paañv se ga.e maiñ sar ke bal gayā

manzūr dil kā thā unheñ lenā so le chuke

ab kyoñ vo paas ā.eñge matlab nikal gayā

qismat to dekhiye jo shab-e-vasl aa.ī bhī

shikve shikāyatoñ hī meñ sab vaqt Tal gayā

aate hī fasl-e-gul ke junūñ kā huā ye josh

dīvāna un kā jaame se bāhar nikal gayā

baaqī haiñ ba.ad-e-qatl bhī ulfat kī garmiyāñ

dil kī taḌap na kam huī go dam nikal gayā

un kī nigāh-e-qahr se ab kyā bachegā dil

palTā nahīñ jo tiir kamāñ se nikal gayā

is Dar se naala kar nahīñ saktā firāq meñ

mar jā.ūñgā jo vo dil-e-nāzuk dahal gayā

kāñToñ kī ābloñ se ġhanīmat thī nok jhoñk

vahshī kā tere dasht meñ kuchh jī bahal gayā

sābit-qadam hamīñ haiñ na ġhairoñ ko muñh lagāo

koī na hogā un meñ se joban jo Dhal gayā

ai 'bazm' mujh se karte vo iqrār-e-vasl kyā

vo to ye kahiye un kī zabāñ se nikal gayā

maqtal mein aaj hausla dil ka nikal gaya

sab apne panw se gae main sar ke bal gaya

manzur dil ka tha unhen lena so le chuke

ab kyon wo pas aaenge matlab nikal gaya

qismat to dekhiye jo shab-e-wasl aai bhi

shikwe shikayaton hi mein sab waqt Tal gaya

aate hi fasl-e-gul ke junun ka hua ye josh

diwana un ka jame se bahar nikal gaya

baqi hain baad-e-qatl bhi ulfat ki garmiyan

dil ki taDap na kam hui go dam nikal gaya

un ki nigah-e-qahr se ab kya bachega dil

palTa nahin jo tir kaman se nikal gaya

is Dar se nala kar nahin sakta firaq mein

mar jaunga jo wo dil-e-nazuk dahal gaya

kanTon ki aablon se ghanimat thi nok jhonk

wahshi ka tere dasht mein kuchh ji bahal gaya

sabit-qadam hamin hain na ghairon ko munh lagao

koi na hoga un mein se joban jo Dhal gaya

ai 'bazm' mujh se karte wo iqrar-e-wasl kya

wo to ye kahiye un ki zaban se nikal gaya