maqtal mein chamakti hui talwar the hum log

maqtal meñ chamaktī huī talvār the ham log

jaañ nazr-guzārī pe bhī tayyār the ham log

ham ahl-e-sharaf log the is shahr meñ lekin

rusvā bhī sar-e-kūcha-o-bāzār the ham log

kaam aate na the ham ko bas ik kār-e-junūñ ke

duniyā kī nigāhoñ meñ to bekār the ham log

is nisbat-e-haq meñ ye sharaf kam to nahīñ hai

zindīq bhī kāfir bhī gunahgār the ham log

us ko bhī to kuchh husn ne maġhrūr kiyā thā

kuchh apnī anā meñ bhī giraftār the ham log

kuchh yādoñ ne us kī hameñ nāshād kiyā hai

kuchh apnī tabī.at se bhī bezār the ham log

ab tū ne bhī apnāne se inkār kiyā hai

a vahshat-e-shab tere azā-dār the ham log

a 'shāhid'-e-ḳhush-baḳht 'yagānā' se ye kah do

kahte haiñ ki 'ġhālib' ke taraf-dār the ham log

maqtal mein chamakti hui talwar the hum log

jaan nazr-guzari pe bhi tayyar the hum log

hum ahl-e-sharaf log the is shahr mein lekin

ruswa bhi sar-e-kucha-o-bazar the hum log

kaam aate na the hum ko bas ek kar-e-junun ke

duniya ki nigahon mein to bekar the hum log

is nisbat-e-haq mein ye sharaf kam to nahin hai

zindiq bhi kafir bhi gunahgar the hum log

us ko bhi to kuchh husn ne maghrur kiya tha

kuchh apni ana mein bhi giraftar the hum log

kuchh yaadon ne us ki hamein nashad kiya hai

kuchh apni tabiat se bhi bezar the hum log

ab tu ne bhi apnane se inkar kiya hai

a wahshat-e-shab tere aza-dar the hum log

a 'shahid'-e-KHush-baKHt 'yagana' se ye kah do

kahte hain ki 'ghaalib' ke taraf-dar the hum log