mariz-e-ishq ki juz-marg duniya mein dawa kyun ho

marīz-e-ishq kī juz-marg duniyā meñ davā kyuuñ ho

agar jaañ ho aziiz apnī to jānāñ par fidā kyuuñ ho

uThe jo aag siine se dabā duuñ us ko ashkoñ se

shab-e-hijrāñ meñ naala se mirā lab āshnā kyuuñ ho

milo ḳhalvat meñ aur do tum mujhe dars-e-shakebā.ī

karam tum meñ na ho to dil mirā sabr-āzmā kyuuñ ho

chale jab tak zabāñ jaarī ho us par dāstān-e-ġham

tavānā.ī tire bīmār kī sarf-e-duā kyuuñ ho

bhalā tū aur ghar aa.e mire kyūñ-kar yaqīñ kar luuñ

taḳhayyul kyuuñ na ho merā tirī āvāz-e-pā kyuuñ ho

agar baḳht-e-rasā ne rahbarī kī terī ḳhalvat tak

to phir dast-e-tamannā rehn-e-dāmān-e-qabā kyuuñ ho

mire ḳhuuñ aur hinā meñ der se bāham raqābat hai

na ho gar rañg-e-ḳhūñ pā meñ to phir rañg-e-hinā kyuuñ ho

qayāmat ek din aa.ī hai is meñ shak nahīñ 'shaidā'

khaḌā ho bazm se jab vo qayāmat phir bapā kyuuñ ho

mariz-e-ishq ki juz-marg duniya mein dawa kyun ho

agar jaan ho aziz apni to jaanan par fida kyun ho

uThe jo aag sine se daba dun us ko ashkon se

shab-e-hijran mein nala se mera lab aashna kyun ho

milo KHalwat mein aur do tum mujhe dars-e-shakebai

karam tum mein na ho to dil mera sabr-azma kyun ho

chale jab tak zaban jari ho us par dastan-e-gham

tawanai tere bimar ki sarf-e-dua kyun ho

bhala tu aur ghar aae mere kyun-kar yaqin kar lun

taKHayyul kyun na ho mera teri aawaz-e-pa kyun ho

agar baKHt-e-rasa ne rahbari ki teri KHalwat tak

to phir dast-e-tamanna rehn-e-daman-e-qaba kyun ho

mere KHun aur hina mein der se baham raqabat hai

na ho gar rang-e-KHun pa mein to phir rang-e-hina kyun ho

qayamat ek din aai hai is mein shak nahin 'shaida'

khaDa ho bazm se jab wo qayamat phir bapa kyun ho