marne wale KHub chhuTe gardish-e-ayyam se

marne vaale ḳhuub chhūTe gardish-e-ayyām se

so rahe haiñ paañv phailā.e hue ārām se

aur to matlab nahīñ kuchh ham ko daur-e-jām se

haañ evaz letā hai saaqī gardish-e-ayyām se

garche tark-e-āshnā.ī ko zamāna ho gayā

lekin ab tak chauñk uThte haiñ vo mere naam se

ishtiyāq-e-mai-kashī kuchh mai-kashī se kam nahīñ

ham to saaqī mast ho jaate haiñ ḳhālī jaam se

mai-kade kā raaz parde hī meñ rahnā ḳhuub thā

dekh saaqī shīsha kuchh kahtā hai thak kar jaam se

zulf-e-sumbul nik.hat-e-gul mauj-e-sabza mauj-e-āb

baaġh meñ koī jagah ḳhālī na dekhī daam se

ham faqīr-e-mai-kada saaqī hameñ kyā chāhiye

hai vahī kaafī chhalak jaatī hai jitnī jaam se

be-nishāñ tujh ko samajh kar sabr aa jaatā mujhe

par ye mushkil hai ki maiñ vāqif huuñ tere naam se

kyā ḳhudā kī shaan hai jin kā vazīfa thā 'jalīl'

aaj vo kahte haiñ maiñ vāqif nahīñ is naam se

marne wale KHub chhuTe gardish-e-ayyam se

so rahe hain panw phailae hue aaram se

aur to matlab nahin kuchh hum ko daur-e-jam se

han ewaz leta hai saqi gardish-e-ayyam se

garche tark-e-ashnai ko zamana ho gaya

lekin ab tak chaunk uThte hain wo mere nam se

ishtiyaq-e-mai-kashi kuchh mai-kashi se kam nahin

hum to saqi mast ho jate hain KHali jam se

mai-kade ka raaz parde hi mein rahna KHub tha

dekh saqi shisha kuchh kahta hai thak kar jam se

zulf-e-sumbul nikhat-e-gul mauj-e-sabza mauj-e-ab

bagh mein koi jagah KHali na dekhi dam se

hum faqir-e-mai-kada saqi hamein kya chahiye

hai wahi kafi chhalak jati hai jitni jam se

be-nishan tujh ko samajh kar sabr aa jata mujhe

par ye mushkil hai ki main waqif hun tere nam se

kya KHuda ki shan hai jin ka wazifa tha 'jalil'

aaj wo kahte hain main waqif nahin is nam se