مصروف ہر گھڑی ہے جو اپنی انا کے ساتھ

مصروف ہر گھڑی ہے جو اپنی انا کے ساتھ

کیسے ملے وہ آتما پر ماتما کے ساتھ

ہر بار کچھ طلب بھی ہے حمد و ثنا کے ساتھ

یہ بندگی ہے یا کہ تجارت خدا کے ساتھ

اچھے برے کا علم ہی تجھ کو نہیں ہے جب

مت چھیڑ چھاڑ کر تو خدا کی رضا کے ساتھ

مانا تو اے طبیب ہے اپنے ہنر میں طاق

لب پہ دعا بھی چاہئے دست شفا کے ساتھ

سورج نہیں کہ ڈر کے میں بادل میں جا چھپوں

دیپک ہوں لڑ مروں گا مخالف ہوا کے ساتھ

تن تو قبا ہے تن سے ہے ہستی تری جدا

اتنا ہے کیوں لگاؤ پرانی قبا کے ساتھ

دیر و حرم کے شور میں ممکن نہیں صداؔ

خلوت میں چل کے ملتے ہیں آؤ خدا کے ساتھ