mast hun muttaqi nahin hun main

mast huuñ muttaqī nahīñ huuñ maiñ

kaam kā aadmī nahīñ huuñ maiñ

mujh ko duniyā kī fikr lāhaq hai

ya.anī koī valī nahīñ huuñ maiñ

tere me.aar kā to duur kī baat

tere matlab kā bhī nahīñ huuñ maiñ

maz.hab-e-ishq kā payambar huuñ

haañ magar āḳhirī nahīñ huuñ maiñ

Dar nahīñ paas aa mire pyāre

nuur huuñ raushnī nahīñ huuñ maiñ

muqtadā huuñ maiñ roz-e-avval se

kāfirā! muqtadī nahīñ huuñ maiñ

aam se kūza-gar kā beTā huuñ

gaañv kā chaudharī nahīñ huuñ maiñ

mujh pe thoḌā sā ġhaur kar 'tahsīn'

huuñ to phir aarzī nahīñ huuñ maiñ

mast hun muttaqi nahin hun main

kaam ka aadmi nahin hun main

mujh ko duniya ki fikr lahaq hai

yani koi wali nahin hun main

tere mear ka to dur ki baat

tere matlab ka bhi nahin hun main

mazhab-e-ishq ka payambar hun

han magar aaKHiri nahin hun main

Dar nahin pas aa mere pyare

nur hun raushni nahin hun main

muqtada hun main roz-e-awwal se

kafira! muqtadi nahin hun main

aam se kuza-gar ka beTa hun

ganw ka chaudhari nahin hun main

mujh pe thoDa sa ghaur kar 'tahsin'

hun to phir aarzi nahin hun main