mausam bhi KHush-gawar zamana bhi ras hai

mausam bhī ḳhush-gavār zamāna bhī raas hai

lekin tire baġhair mirā jī udaas hai

ai husn-e-pur-hijāb zarā sāmne to aa

in tishna-lab nigāhoñ ko jalve kī aas hai

arsa huā hai tark-e-mohabbat kiye hue

phir bhī na jaane kyuuñ tere milne kī aas hai

kahte haiñ kis ko ishq mujhe ye ḳhabar nahīñ

ik mīThā mīThā dard mere dil ke paas hai

yuuñ to bahut haiñ duniyā meñ zī-rūh hastiyāñ

bas aadmī vahī hai ki jo ġham-shanās hai

bas aap kā hī naam hai vird-e-zabāñ huzūr

ye saarī zindagī kā merī iqtibās hai

'shevan' ye iztirāb-e-mohabbat kā hai karam

dil kyā udaas saarā zamāna udaas hai

mausam bhi KHush-gawar zamana bhi ras hai

lekin tere baghair mera ji udas hai

ai husn-e-pur-hijab zara samne to aa

in tishna-lab nigahon ko jalwe ki aas hai

arsa hua hai tark-e-mohabbat kiye hue

phir bhi na jaane kyun tere milne ki aas hai

kahte hain kis ko ishq mujhe ye KHabar nahin

ek miTha miTha dard mere dil ke pas hai

yun to bahut hain duniya mein zi-ruh hastiyan

bas aadmi wahi hai ki jo gham-shanas hai

bas aap ka hi nam hai wird-e-zaban huzur

ye sari zindagi ka meri iqtibas hai

'shewan' ye iztirab-e-mohabbat ka hai karam

dil kya udas sara zamana udas hai