mausam-e-gul mein bhi gul nazr-e-KHizan hain sare

mausam-e-gul meñ bhī gul nazr-e-ḳhizāñ haiñ saare

mutma.in koī nahīñ mahv-e-fuġhāñ haiñ saare

hosh-mandī se qadam aage baḌhāo logo

apnī jānib hī khiñche tīr-o-kamāñ haiñ saare

chahchahāne kī sadā aa.ī thī kal tak jin se

jaane kyoñ aaj vo ḳhāmosh makāñ haiñ saare

sirf dīvār kī ūñchā.ī nazar aatī hai

ai mire shahr mire log kahāñ haiñ saare

ab ḳhudā ḳhair kare qāfila vāloñ kī mire

kho.e kho.e hue manzil ke nishāñ haiñ saare

kitnā dhuñdlā diyā hālāt ne tum ko 'shauqī'

jin ko tum abr samajhte ho dhuāñ haiñ saare

mausam-e-gul mein bhi gul nazr-e-KHizan hain sare

mutmain koi nahin mahw-e-fughan hain sare

hosh-mandi se qadam aage baDhao logo

apni jaanib hi khinche tir-o-kaman hain sare

chahchahane ki sada aai thi kal tak jin se

jaane kyon aaj wo KHamosh makan hain sare

sirf diwar ki unchai nazar aati hai

ai mere shahr mere log kahan hain sare

ab KHuda KHair kare qafila walon ki mere

khoe khoe hue manzil ke nishan hain sare

kitna dhundla diya haalat ne tum ko 'shauqi'

jin ko tum abr samajhte ho dhuan hain sare