maut se yari na thi hasti se be-zari na thi

maut se yaarī na thī hastī se be-zārī na thī

us safar par chal diye ham jis kī tayyārī na thī

ham usī kī ḳhaak se uTThe haiñ kundan ban ke aaj

dosto jis shahr meñ rasm-e-vafādārī na thī

ham ne ḳhūn-e-ārzū de kar munaqqash kar diyā

varna dīvār-e-talab par aisī gul-kārī na thī

mar ga.e sar phoḌ ke dīvār-e-zindāñ se asiir

zindagī kunj-e-qafas meñ maut se pyārī na thī

ab shikast-e-ārzū hai bā.is-e-taskīn-e-dil

is se pahle to kabhī ye kaifiyat taarī na thī

jal rahā hai har nafas ab apne ġham kī aañch se

saañs lene meñ kabhī 'mohsin' ye dushvārī na thī

maut se yari na thi hasti se be-zari na thi

us safar par chal diye hum jis ki tayyari na thi

hum usi ki KHak se uTThe hain kundan ban ke aaj

dosto jis shahr mein rasm-e-wafadari na thi

hum ne KHun-e-arzu de kar munaqqash kar diya

warna diwar-e-talab par aisi gul-kari na thi

mar gae sar phoD ke diwar-e-zindan se asir

zindagi kunj-e-qafas mein maut se pyari na thi

ab shikast-e-arzu hai bais-e-taskin-e-dil

is se pahle to kabhi ye kaifiyat tari na thi

jal raha hai har nafas ab apne gham ki aanch se

sans lene mein kabhi 'mohsin' ye dushwari na thi