mere honTon pe tere nam ki larzish to nahin

mere hoñToñ pe tere naam kī larzish to nahīñ

ye jo āñkhoñ meñ chamak hai koī ḳhvāhish to nahīñ

rañg malbūs hue lams huī hai ḳhush-bū

aaj phir shahr meñ phūloñ kī numā.ish to nahīñ

ek hī saañs meñ dohrā.e chale jaate haiñ

ye mohabbat kahīñ alfāz kī varzish to nahīñ

dekhtā rahtā huuñ chup-chāp guzarte bādal

ye ta.alluq bhī koī dhuup kī bārish to nahīñ

tum kabhī ek nazar merī taraf bhī dekho

ik tavaqqo hī to hai koī guzārish to nahīñ

mil bhī jaa.eñ kahīñ āñkheñ to marammat na kareñ

ham meñ aisī koī talḳhī koī ranjish to nahīñ

mere honTon pe tere nam ki larzish to nahin

ye jo aankhon mein chamak hai koi KHwahish to nahin

rang malbus hue lams hui hai KHush-bu

aaj phir shahr mein phulon ki numaish to nahin

ek hi sans mein dohrae chale jate hain

ye mohabbat kahin alfaz ki warzish to nahin

dekhta rahta hun chup-chap guzarte baadal

ye talluq bhi koi dhup ki barish to nahin

tum kabhi ek nazar meri taraf bhi dekho

ek tawaqqo hi to hai koi guzarish to nahin

mil bhi jaen kahin aankhen to marammat na karen

hum mein aisi koi talKHi koi ranjish to nahin