meri pahchan hai kya mera pata de mujhko

merī pahchān hai kyā merā pata de mujh ko

koī ā.īna agar hai to dikhā de mujh ko

tujh se miltā huuñ to aksar ye ḳhayāl aatā hai

is bulandī se agar koī girā de mujh ko

kab se patthar kī chaTTānoñ meñ huuñ gumnām o asiir

devtāoñ kī tarah koī jagā de mujh ko

ek ā.īna sar-e-rāh liye baiThā huuñ

jurm aisā hai ki har shaḳhs sazā de mujh ko

in añdheroñ meñ akelā hī jalūñgā kab tak

koī shai tū bhī to ḳhurshīd-numā de mujh ko

meri pahchan hai kya mera pata de mujh ko

koi aaina agar hai to dikha de mujh ko

tujh se milta hun to aksar ye KHayal aata hai

is bulandi se agar koi gira de mujh ko

kab se patthar ki chaTTanon mein hun gumnam o asir

dewtaon ki tarah koi jaga de mujh ko

ek aaina sar-e-rah liye baiTha hun

jurm aisa hai ki har shaKHs saza de mujh ko

in andheron mein akela hi jalunga kab tak

koi shai tu bhi to KHurshid-numa de mujh ko