mez pe chehra zulfen kaghaz par

mez pe chehrā zulfeñ kāġhaz par

dekh rahā hai hairat se daftar

chehre par shikva kartī āñkheñ

āñkhoñ meñ aadhā ḳhālī sāġhar

gaal pe tiin lakīreñ aañsū kī

kānoñ meñ hiire ke do kankar

bātoñ meñ mausīqī jaisī taal

sāḌhe saat aur pañdrah kā chakkar

ab to ghar se bāhar jaane do

chipak gayā hai khiḌkī par manzar

uryānī kī baat nahīñ is meñ

phūloñ ko dāman kī kahāñ ḳhabar

afsāna to nahīñ hayāt mirī

ek ġhazal thī jis kā pair na sar

is ummīd meñ ghaas pe leTā huuñ

koī sitārā degā terī ḳhabar

apne paap to dho Daale ham ne

kaise dho.eñ paanī kī chādar

ḳhvāboñ meñ shatranj ke chau-ḳhāne

binā zor ke paidal jaa.e kidhar

jab dekhā ki ḳhair nahīñ milnī

chhoḌ diyā ummīd ne merā dar

kār-e-duniyā se kyā paanā hai

ret bharī hai miTTī ke andar

kaaTā to donoñ mar jā.eñge

juḌe hue bachche haiñ ḳhair aur shar

mez pe chehra zulfen kaghaz par

dekh raha hai hairat se daftar

chehre par shikwa karti aankhen

aankhon mein aadha KHali saghar

gal pe tin lakiren aansu ki

kanon mein hire ke do kankar

baaton mein mausiqi jaisi tal

saDhe sat aur pandrah ka chakkar

ab to ghar se bahar jaane do

chipak gaya hai khiDki par manzar

uryani ki baat nahin is mein

phulon ko daman ki kahan KHabar

afsana to nahin hayat meri

ek ghazal thi jis ka pair na sar

is ummid mein ghas pe leTa hun

koi sitara dega teri KHabar

apne pap to dho Dale hum ne

kaise dhoen pani ki chadar

KHwabon mein shatranj ke chau-KHane

bina zor ke paidal jae kidhar

jab dekha ki KHair nahin milni

chhoD diya ummid ne mera dar

kar-e-duniya se kya pana hai

ret bhari hai miTTi ke andar

kaTa to donon mar jaenge

juDe hue bachche hain KHair aur shar