mil gaya jab wo nagin phir KHubi-e-taqdir se

mil gayā jab vo nagīñ phir ḳhūbi-e-taqdīr se

dil ko kyā kyā vahshateñ haiñ sañg kī tāsīr se

jaltā bujhtā ek jugnū kī tarah terā ḳhayāl

bas yahī nisbat hai apnī raat ko tanvīr se

phir havā ke haath par bai.at ko dil betāb hai

aañkh phir raushan huī hai gard kī tahrīr se

shab na jaane aañkh par kyā raaz ifshā kar ga.ī

ḳhvāb chaknāchūr ho kar rah ga.e ta.abīr se

ḳhud-farebī hai ki is ko āgahī kā naam duuñ

apnī qāmat nāptā hai aaj vo shamshīr se

is shikasta ghar kā girnā yuuñ lagā mujh ko 'nizām'

TuuT jaa.e ik kaḌī jaise kisī zanjīr se

mil gaya jab wo nagin phir KHubi-e-taqdir se

dil ko kya kya wahshaten hain sang ki tasir se

jalta bujhta ek jugnu ki tarah tera KHayal

bas yahi nisbat hai apni raat ko tanwir se

phir hawa ke hath par baiat ko dil betab hai

aankh phir raushan hui hai gard ki tahrir se

shab na jaane aankh par kya raaz ifsha kar gai

KHwab chaknachur ho kar rah gae tabir se

KHud-farebi hai ki is ko aagahi ka nam dun

apni qamat napta hai aaj wo shamshir se

is shikasta ghar ka girna yun laga mujh ko 'nizam'

TuT jae ek kaDi jaise kisi zanjir se