milna na milna ek bahana hai aur bas

milnā na milnā ek bahāna hai aur bas

tum sach ho baaqī jo hai fasāna hai aur bas

logoñ ko rāste kī zarūrat hai aur mujhe

ik sañg-e-rahguzar ko haTānā hai aur bas

masrūfiyat ziyāda nahīñ hai mirī yahāñ

miTTī se ik charāġh banānā hai aur bas

so.e hue to jaag hī jā.eñge ek din

jo jāgte haiñ un ko jagānā hai aur bas

tum vo nahīñ ho jin se vafā kī umiid hai

tum se mirī murād zamāna hai aur bas

phūloñ ko DhūñDtā huā phirtā huuñ baaġh meñ

bād-e-sabā ko kaam dilānā hai aur bas

aab o havā to yuuñ bhī mirā mas.ala nahīñ

mujh ko to ik daraḳht lagānā hai aur bas

nīñdoñ kā rat-jagoñ se ulajhnā yūñhī nahīñ

ik ḳhvāb-e-rā.egāñ ko bachānā hai aur bas

ik vā'da jo kiyā hī nahīñ hai abhī 'salīm'

mujh ko vahī to vā'da nibhānā hai aur bas

milna na milna ek bahana hai aur bas

tum sach ho baqi jo hai fasana hai aur bas

logon ko raste ki zarurat hai aur mujhe

ek sang-e-rahguzar ko haTana hai aur bas

masrufiyat ziyaada nahin hai meri yahan

miTTi se ek charagh banana hai aur bas

soe hue to jag hi jaenge ek din

jo jagte hain un ko jagana hai aur bas

tum wo nahin ho jin se wafa ki umid hai

tum se meri murad zamana hai aur bas

phulon ko DhunDta hua phirta hun bagh mein

baad-e-saba ko kaam dilana hai aur bas

aab o hawa to yun bhi mera masala nahin

mujh ko to ek daraKHt lagana hai aur bas

nindon ka rat-jagon se ulajhna yunhi nahin

ek KHwab-e-raegan ko bachana hai aur bas

ek wa'da jo kiya hi nahin hai abhi 'salim'

mujh ko wahi to wa'da nibhana hai aur bas