milte hi KHud ko aap se wabasta kah diya

milte hī ḳhud ko aap se vābasta kah diyā

mahsūs jo kiyā vahī bar-jasta kah diyā

ḳhurshīd-e-sub.h-e-nau ko shikāyat hai dosto

kyuuñ shab se ham ne sub.h ko paivasta kah diyā

maiñ chup huā to zaḳhm mire bolne lage

sab kuchh zabān-e-hāl se lab-basta kah diyā

chaltā rahā to dasht-navardī kā tanz thā

Thahrā zarā to aap ne pā-basta kah diyā

dekhī ga.ī na aap kī andoh-ḳhātirī

kāñTe mile to un ko bhī gul-dasta kah diyā

dekhā to ek aag kā dariyā thā maujzan

is dard-e-nā-sazā ne jise rasta kah diyā

mujrim the vo jo kar na sake irtikāb-e-jurm

mulzim huuñ maiñ jo raaz thā sar-basta kah diyā

nā-āshnā-e-soz-e-darūñ kyā samajh sakeñ

kyuuñ ḳhud ko ham ne aaj jigar-ḳhasta kah diyā

milte hi KHud ko aap se wabasta kah diya

mahsus jo kiya wahi bar-jasta kah diya

KHurshid-e-subh-e-nau ko shikayat hai dosto

kyun shab se hum ne subh ko paiwasta kah diya

main chup hua to zaKHm mere bolne lage

sab kuchh zaban-e-haal se lab-basta kah diya

chalta raha to dasht-nawardi ka tanz tha

Thahra zara to aap ne pa-basta kah diya

dekhi gai na aap ki andoh-KHatiri

kanTe mile to un ko bhi gul-dasta kah diya

dekha to ek aag ka dariya tha maujzan

is dard-e-na-saza ne jise rasta kah diya

mujrim the wo jo kar na sake irtikab-e-jurm

mulzim hun main jo raaz tha sar-basta kah diya

na-ashna-e-soz-e-darun kya samajh saken

kyun KHud ko hum ne aaj jigar-KHasta kah diya