us ka KHiram dekh ke jaya na jaega

us kā ḳhirām dekh ke jaayā na jā.egā

ai kabk phir bahāl bhī aayā na jā.egā

ham kushtgān-e-ishq haiñ abrū-o-chashm-e-yar

sar se hamāre teġh kā saaya na jā.egā

ham rahravān-e-rāh-e-fanā haiñ barañg-e-umr

jāveñge aise khoj bhī paayā na jā.egā

phoḌā sā saarī raat jo paktā rahegā dil

to sub.h tak to haath lagāyā na jā.egā

apne shahīd-e-nāz se bas haath uThā ki phir

dīvān-e-hashr meñ use laayā na jā.egā

ab dekh le ki siina bhī taaza huā hai chaak

phir ham se apnā haal dikhāyā na jā.egā

ham be-ḳhudān-e-mahfil-e-tasvīr ab ga.e

ā.inda ham se aap meñ aayā na jā.egā

go be-sutūñ ko Taal de aage se kohkan

sañg-e-garān-e-ishq uThāyā na jā.egā

ham to ga.e the shaiḳh ko insān buujh kar

par ab se ḳhānqāh meñ jaayā na jā.egā

yaad us kī itnī ḳhuub nahīñ 'mīr' baaz aa

nādān phir vo jī se bhulāyā na jā.egā

us ka KHiram dekh ke jaya na jaega

ai kabk phir bahaal bhi aaya na jaega

hum kushtgan-e-ishq hain abru-o-chashm-e-yar

sar se hamare tegh ka saya na jaega

hum rahrawan-e-rah-e-fana hain barang-e-umr

jawenge aise khoj bhi paya na jaega

phoDa sa sari raat jo pakta rahega dil

to subh tak to hath lagaya na jaega

apne shahid-e-naz se bas hath uTha ki phir

diwan-e-hashr mein use laya na jaega

ab dekh le ki sina bhi taza hua hai chaak

phir hum se apna haal dikhaya na jaega

hum be-KHudan-e-mahfil-e-taswir ab gae

aainda hum se aap mein aaya na jaega

go be-sutun ko Tal de aage se kohkan

sang-e-garan-e-ishq uThaya na jaega

hum to gae the shaiKH ko insan bujh kar

par ab se KHanqah mein jaya na jaega

yaad us ki itni KHub nahin 'mir' baz aa

nadan phir wo ji se bhulaya na jaega