mere badan ki tapish ruh tak utarega

mire badan kī tapish ruuh tak utāregā

vo aa.ine meñ kabhī merā ruup dhāregā

shu.ūr-e-ġham use dohrā.egā hazāroñ baar

ye ek raat ka.ī saal tak guzāregā

kabhī to aa.egī bād-e-sumūm is jānib

kabhī to vaqt mujhe shāḳh se utāregā

yuuñ nañge sar na chalo kūcha-e-tasavvur meñ

ḳhayāl lafz kā patthar uThā ke māregā

ai ahl-e-shahr uThāo na itne ūñche makāñ

shab-e-firāq kise rāsta pukāregā

havas kā aks paḌegā akele kamre meñ

koī na hogā to ā.īna aañkh māregā

vo laḌ-jhagaḌ ke chalā to gayā hai duur kahīñ

na jaane 'ashk' mujhe kis tarah bisāregā

mere badan ki tapish ruh tak utarega

wo aaine mein kabhi mera rup dhaarega

shuur-e-gham use dohraega hazaron bar

ye ek raat kai sal tak guzarega

kabhi to aaegi baad-e-sumum is jaanib

kabhi to waqt mujhe shaKH se utarega

yun nange sar na chalo kucha-e-tasawwur mein

KHayal lafz ka patthar uTha ke marega

ai ahl-e-shahr uThao na itne unche makan

shab-e-firaq kise rasta pukarega

hawas ka aks paDega akele kamre mein

koi na hoga to aaina aankh marega

wo laD-jhagaD ke chala to gaya hai dur kahin

na jaane 'ashk' mujhe kis tarah bisarega