mire josh-e-ġham kī hai ajab kahānī
kabhī uThtā sho.ala kabhī bahtā paanī
hai ḳhushī kā saudā ḳhalish-e-nihānī
hai jigar kā chhālā samar-e-javānī
jo ḳhushī hai faanī to hai ġham bhī faanī
na ye jāvedānī na vo jāvedānī
azalī mohabbat abadī kahānī
ki pas-e-fanā hai na.ī zindagānī
sitam-o-razā meñ ye hai ahd-e-mohkam
jo tirī kahānī vo marī kahānī
vo uTheñge tūfāñ ki ḳhudā bachā.e
ye na.e nazāre ye bharī javānī
ye nigāh tirchhī ye bal abrūoñ kā
har adā hai dilkash magar imtihānī
mirī kashti-e-dil dam-e-āh-o-afġhāñ
kabhī bādbānī to kabhī dahānī
dar-e-dil se palTā har ik aane vaalā
tirī yaad kyā thī mirī pāsbānī
ye tirā talavvun ye badaltī chitvan
ajab ik balā hai ki hai nā-gahānī
mirī kisht-e-dil par pa-e-zhāla-bārī
hai saped bādal aqab-e-javānī
kabhī aarzū thā yahī dāġh-e-hasrat
mujhe jo banā de tirī mehrbānī
mere josh-e-gham ki hai ajab kahani
kabhi uThta shoala kabhi bahta pani
hai KHushi ka sauda KHalish-e-nihani
hai jigar ka chhaala samar-e-jawani
jo KHushi hai fani to hai gham bhi fani
na ye jawedani na wo jawedani
azali mohabbat abadi kahani
ki pas-e-fana hai nai zindagani
sitam-o-raza mein ye hai ahd-e-mohkam
jo teri kahani wo mari kahani
wo uThenge tufan ki KHuda bachae
ye nae nazare ye bhari jawani
ye nigah tirchhi ye bal abruon ka
har ada hai dilkash magar imtihani
meri kashti-e-dil dam-e-ah-o-afghan
kabhi baadbani to kabhi dahani
dar-e-dil se palTa har ek aane wala
teri yaad kya thi meri pasbani
ye tera talawwun ye badalti chitwan
ajab ek bala hai ki hai na-gahani
meri kisht-e-dil par pa-e-zhaala-bari
hai saped baadal aqab-e-jawani
kabhi aarzu tha yahi dagh-e-hasrat
mujhe jo bana de teri mehrbani
Source:
Nishaan-e-Aarzu (Pg. ebook-116 page-106)
-
Author:
Anwar Husain Arzoo
-
- Year of Publication: 1968
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.