meri baat ka jo yaqin nahin mujhe aazma ke bhi dekh le

mirī baat kā jo yaqīñ nahīñ mujhe aazmā ke bhī dekh le

tujhe dil to kab kā maiñ de chukā use ġham banā ke bhī dekh le

ye to Thiik hai ki tirī jafā bhī ik atā mire vāste

mirī hasratoñ kī qasam tujhe kabhī muskurā ke bhī dekh le

mirā dil alag hai bujhā sā kuchh tire husn par bhī chamak nahīñ

kabhī ek markaz-e-zīst par unheñ saath lā ke bhī dekh le

mire shauq kī haiñ vahī zideñ abhī lab pe hai vahī iltijā

kabhī is jale hue tuur par mujhe phir bulā ke bhī dekh le

na miTegā naqsh-e-vafā kabhī na miTegā haañ na miTegā ye

kisī aur kī to majāl kyā use ḳhud miTā ke bhī dekh le

kisī gul-e-fasurda-e-bāġh huuñ mire lab hañsī ko bhulā chuke

tujhe ai sabā jo na ho yaqīñ mujhe gudgudā ke bhī dekh le

mire dil meñ tū hī hai jalva-gar tirā aa.ina huuñ maiñ sar-basar

yūñhī duur hī se nazar na kar kabhī paas aa ke bhī dekh le

mire zarf-e-ishq pe shak na kar mire harf-e-shauq ko bhuul jā

jo yahī hijāb hai darmiyāñ ye hijāb uThā ke bhī dekh le

ye jahān hai ise kyā paḌī hai jo ye sune tirī dāstāñ

tujhe phir bhī 'mullā' agar hai zid ġham-e-dil sunā ke bhī dekh le

meri baat ka jo yaqin nahin mujhe aazma ke bhi dekh le

tujhe dil to kab ka main de chuka use gham bana ke bhi dekh le

ye to Thik hai ki teri jafa bhi ek ata mere waste

meri hasraton ki qasam tujhe kabhi muskura ke bhi dekh le

mera dil alag hai bujha sa kuchh tere husn par bhi chamak nahin

kabhi ek markaz-e-zist par unhen sath la ke bhi dekh le

mere shauq ki hain wahi ziden abhi lab pe hai wahi iltija

kabhi is jale hue tur par mujhe phir bula ke bhi dekh le

na miTega naqsh-e-wafa kabhi na miTega han na miTega ye

kisi aur ki to majal kya use KHud miTa ke bhi dekh le

kisi gul-e-fasurda-e-bagh hun mere lab hansi ko bhula chuke

tujhe ai saba jo na ho yaqin mujhe gudguda ke bhi dekh le

mere dil mein tu hi hai jalwa-gar tera aaina hun main sar-basar

yunhi dur hi se nazar na kar kabhi pas aa ke bhi dekh le

mere zarf-e-ishq pe shak na kar mere harf-e-shauq ko bhul ja

jo yahi hijab hai darmiyan ye hijab uTha ke bhi dekh le

ye jahan hai ise kya paDi hai jo ye sune teri dastan

tujhe phir bhi 'mulla' agar hai zid gham-e-dil suna ke bhi dekh le