meri nigah ko jalwon ka hausla de do

mirī nigāh ko jalvoñ kā hausla de do

guzar-basar kā koī bhī to aasrā de do

tumhārī bazm se jaatā hai nā-murād koī

safar-ba-ḳhair kī jān-e-vafā duā de do

atā pe harf na aa jaa.e māñgne se mire

ḳhudā ho mere to phir hasb-e-mudda.ā de do

miTā do merī nigāhoñ se tum nuqūsh tamām

vagarna dūsrā mujh ko ik aa.ina de do

fareb-e-sharh-e-tamannā bhī khā le ab ye dil

laboñ ko jur.at-e-iz.hār-e-mudda.ā de do

junūñ-navāz-o-junūñ-ḳhez-o-sad-junūñ-sāmāñ

tum apne jalvoñ ko aisī koī adā de do

adū ko shikva-e-lazzat koī na rah jaa.e

mire lahū ko kuchh aisā hī zā.iqa de do

ġhazal kī aabrū tum ho ġhazal mujhe mahbūb

shu.ūr-e-fikr ko uslūb-e-ḳhush-numā de do

ye dil to dushman-e-jānī hai ek muddat se

jo ġham-navāz ho aisā ġham-āshnā de do

libās-e-kohna ġhazal kā utaar kar 'tarzī'

ba-faiz tab-e-rasā ik na.ī qabā de do

meri nigah ko jalwon ka hausla de do

guzar-basar ka koi bhi to aasra de do

tumhaari bazm se jata hai na-murad koi

safar-ba-KHair ki jaan-e-wafa dua de do

ata pe harf na aa jae mangne se mere

KHuda ho mere to phir hasb-e-muddaa de do

miTa do meri nigahon se tum nuqush tamam

wagarna dusra mujh ko ek aaina de do

fareb-e-sharh-e-tamanna bhi kha le ab ye dil

labon ko jurat-e-izhaar-e-muddaa de do

junun-nawaz-o-junun-KHez-o-sad-junun-saman

tum apne jalwon ko aisi koi ada de do

adu ko shikwa-e-lazzat koi na rah jae

mere lahu ko kuchh aisa hi zaiqa de do

ghazal ki aabru tum ho ghazal mujhe mahbub

shuur-e-fikr ko uslub-e-KHush-numa de do

ye dil to dushman-e-jaani hai ek muddat se

jo gham-nawaz ho aisa gham-ashna de do

libas-e-kohna ghazal ka utar kar 'tarzi'

ba-faiz tab-e-rasa ek nai qaba de do