meri sahba-parasti morid-e-ilzam hai saqi

mirī sahbā-parastī morid-e-ilzām hai saaqī

ḳhirad vāloñ kī mahfil meñ junūñ badnām hai saaqī

junūñ meñ aur ḳhirad meñ dar-haqīqat farq itnā hai

vo zer-e-dar hai saaqī aur ye zer-e-dām hai saaqī

sū-e-manzil baḌhe jaatā huuñ mai-ḳhāna ba mai-ḳhāna

mazāq-e-justujū tishna-labī kā naam hai saaqī

kabhī jo chaar qatre bhī salīqe se na pī paa.e

vo rind-e-ḳhām hai saaqī vo nañg-e-jām hai saaqī

nahīñ hai aaj bhī shā.ista-e-ādāb-e-mai-noshī

vo ik rind-e-balā-kash jis kā 'tābāñ' naam hai saaqī

meri sahba-parasti morid-e-ilzam hai saqi

KHirad walon ki mahfil mein junun badnam hai saqi

junun mein aur KHirad mein dar-haqiqat farq itna hai

wo zer-e-dar hai saqi aur ye zer-e-dam hai saqi

su-e-manzil baDhe jata hun mai-KHana ba mai-KHana

mazaq-e-justuju tishna-labi ka nam hai saqi

kabhi jo chaar qatre bhi saliqe se na pi pae

wo rind-e-KHam hai saqi wo nang-e-jam hai saqi

nahin hai aaj bhi shaista-e-adab-e-mai-noshi

wo ek rind-e-bala-kash jis ka 'taban' nam hai saqi