miTTi thi KHafa mauj uTha le gai hum ko

miTTī thī ḳhafā mauj uThā le ga.ī ham ko

girdāb meñ sāhil kī balā le ga.ī ham ko

ham kab se lapakte hue sholoñ meñ khaḌe haiñ

is aag meñ ik gul kī havā le ga.ī ham ko

ik sarv kī ḳhush-qāmatī āñkhoñ meñ basī thī

jo zillat-e-duniyā se bachā le ga.ī ham ko

saa.e ke ta.āqub meñ gañvā.ī hai magar umr

har samt vahī ek sadā le ga.ī ham ko

tū jān-e-mohabbat hai magar terī taraf bhī

ik ḳhvāhish-e-tash.hīr-e-vafā le ga.ī ham ko

miTTi thi KHafa mauj uTha le gai hum ko

girdab mein sahil ki bala le gai hum ko

hum kab se lapakte hue sholon mein khaDe hain

is aag mein ek gul ki hawa le gai hum ko

ek sarw ki KHush-qamati aankhon mein basi thi

jo zillat-e-duniya se bacha le gai hum ko

sae ke taaqub mein ganwai hai magar umr

har samt wahi ek sada le gai hum ko

tu jaan-e-mohabbat hai magar teri taraf bhi

ek KHwahish-e-tashhir-e-wafa le gai hum ko