miyan majburiyon ka rabt aksar TuT jata hai

miyāñ majbūriyoñ kā rabt aksar TuuT jaatā hai

vafā.eñ gar na hoñ buniyād meñ ghar TuuT jaatā hai

shanāvar ko koī daldal nahīñ dariyā diyā jaa.e

jahāñ kam-zarf baiThe hoñ suḳhanvar TuuT jaatā hai

anā ḳhuddār kī rakhtī hai us kā sar bulandī par

kisī poras ke aage har sikandar TuuT jaatā hai

ham apne dosto ke tanz sun kar muskurāte haiñ

magar us vaqt kuchh andar hī andar TuuT jaatā hai

mire dushman ke jo hālāt haiñ un se ye zāhir hai

ki ab shīshe se Takrāne pe patthar TuuT jaatā hai

sañjo rakkhī haiñ dil meñ qīmtī yādeñ magar phir bhī

bas ik nāzuk sī Thokar se ye locker TuuT jaatā hai

kināre par nahīñ ai dost maiñ ḳhud hī kināra huuñ

mujhe chhūne kī koshish meñ samundar TuuT jaatā hai

miyan majburiyon ka rabt aksar TuT jata hai

wafaen gar na hon buniyaad mein ghar TuT jata hai

shanawar ko koi daldal nahin dariya diya jae

jahan kam-zarf baiThe hon suKHanwar TuT jata hai

ana KHuddar ki rakhti hai us ka sar bulandi par

kisi poras ke aage har sikandar TuT jata hai

hum apne dosto ke tanz sun kar muskuraate hain

magar us waqt kuchh andar hi andar TuT jata hai

mere dushman ke jo haalat hain un se ye zahir hai

ki ab shishe se Takrane pe patthar TuT jata hai

sanjo rakkhi hain dil mein qimti yaaden magar phir bhi

bas ek nazuk si Thokar se ye locker TuT jata hai

kinare par nahin ai dost main KHud hi kinara hun

mujhe chhune ki koshish mein samundar TuT jata hai