mohabbat ka hoga asar rafta rafta

mohabbat kā hogā asar rafta rafta

nazar se milegī nazar rafta rafta

shab-e-ġham kī tūlāniyoñ se na ghabrā

ki is kī bhī hogī sahar rafta rafta

nazar un kī aise milī hai ki jaise

milā.eñge dil bhī magar rafta rafta

qafas se rihā.ī to mil jaa.e pahle

nikal ā.eñge bāl-o-par rafta rafta

mirī bandagī kā karishma to dekho

jabīñ ban ga.ī sañg-e-dar rafta rafta

jahāñ ham kahīñ naqsh-e-pā chhoḌ aa.e

vahīñ ban ga.ī rahguzar rafta rafta

mire saath jo do qadam bhī chalā hai

vahī ban gayā ham-safar rafta rafta

ḳhudā jaane kyuuñ sar jhukāne lage haiñ

mujhe dekh kar chāragar rafta rafta

abhī us ne aane kā va.ada kiyā hai

chamakne lage bām-o-dar rafta rafta

shab-e-ġham kī rūdād kyā pūchhte ho

'sahar' ko milī hai sahar rafta rafta

mohabbat ka hoga asar rafta rafta

nazar se milegi nazar rafta rafta

shab-e-gham ki tulaniyon se na ghabra

ki is ki bhi hogi sahar rafta rafta

nazar un ki aise mili hai ki jaise

milaenge dil bhi magar rafta rafta

qafas se rihai to mil jae pahle

nikal aaenge baal-o-par rafta rafta

meri bandagi ka karishma to dekho

jabin ban gai sang-e-dar rafta rafta

jahan hum kahin naqsh-e-pa chhoD aae

wahin ban gai rahguzar rafta rafta

mere sath jo do qadam bhi chala hai

wahi ban gaya ham-safar rafta rafta

KHuda jaane kyun sar jhukane lage hain

mujhe dekh kar chaaragar rafta rafta

abhi us ne aane ka wada kiya hai

chamakne lage baam-o-dar rafta rafta

shab-e-gham ki rudad kya puchhte ho

'sahar' ko mili hai sahar rafta rafta