mohabbat ka ye ruKH dekha nahin tha

mohabbat kā ye ruḳh dekhā nahīñ thā

vo yuuñ badlegā ye sochā nahīñ thā

ajab hai sah ke zaḳhm-e-be-vafā.ī

ye dil kahtā hai vo aisā nahīñ thā

sabab koī to hai un nafratoñ kā

maiñ jhūTā thā ki vo sachchā nahīñ thā

na jaane kyuuñ mire hisse meñ aayā

vo dukh qismat meñ jo likkhā nahīñ thā

bahut tanhā.iyāñ thiiñ is se pahle

magar itnā bhī maiñ tanhā nahīñ thā

chalo kuchh to ghuTan kam ho ga.ī hai

bahut din ho ga.e royā nahīñ thā

kināre par khaḌā vo kah rahā hai

samundar is qadar gahrā nahīñ thā

sabhī kuchh hai 'nadīm' ab paas mere

bas ik vo shaḳhs jo merā nahīñ thā

mohabbat ka ye ruKH dekha nahin tha

wo yun badlega ye socha nahin tha

ajab hai sah ke zaKHm-e-be-wafai

ye dil kahta hai wo aisa nahin tha

sabab koi to hai un nafraton ka

main jhuTa tha ki wo sachcha nahin tha

na jaane kyun mere hisse mein aaya

wo dukh qismat mein jo likkha nahin tha

bahut tanhaiyan thin is se pahle

magar itna bhi main tanha nahin tha

chalo kuchh to ghuTan kam ho gai hai

bahut din ho gae roya nahin tha

kinare par khaDa wo kah raha hai

samundar is qadar gahra nahin tha

sabhi kuchh hai 'nadim' ab pas mere

bas ek wo shaKHs jo mera nahin tha