muddat se hai libas-e-badan tar tar dost

muddat se hai libās-e-badan taar taar dost

mailā bhī hai utaar ab is ko utaar dost

baḳhiye kī ab jagah hai na paivand kī jagah

kyā sī rahe haiñ is ko tire ġham-gusār dost

thā jis meñ zindagī kā gumāñ vo to jā chukī

ye zindagī hai us ke qadam kā ġhubār dost

jo zindagī thī laġhzish-e-paiham kā silsila

hai jumbish-e-ḳhafīf use nāgavār dost

aage jo jā chukā hai vo har lamha-e-hayāt

tujh ko pukārtā hai sun us kī pukār dost

hālāt ne jo laad diyā terī piiTh par

gardan jhaTak ke pheñk de jaldī vo baar dost

thī zindagī ḳhudā kā ġhazab aur 'maz.harī'

maut ik ḳhudā kā pyaar hai le us kā pyaar dost

muddat se hai libas-e-badan tar tar dost

maila bhi hai utar ab is ko utar dost

baKHiye ki ab jagah hai na paiwand ki jagah

kya si rahe hain is ko tere gham-gusar dost

tha jis mein zindagi ka guman wo to ja chuki

ye zindagi hai us ke qadam ka ghubar dost

jo zindagi thi laghzish-e-paiham ka silsila

hai jumbish-e-KHafif use nagawar dost

aage jo ja chuka hai wo har lamha-e-hayat

tujh ko pukarta hai sun us ki pukar dost

haalat ne jo lad diya teri piTh par

gardan jhaTak ke phenk de jaldi wo bar dost

thi zindagi KHuda ka ghazab aur 'mazhari'

maut ek KHuda ka pyar hai le us ka pyar dost