mujhko aashiq kah ke uske ru-ba-ru mat kijiyo

mujh ko āshiq kah ke us ke rū-ba-rū mat kījiyo

dostāñ gar dost ho to ye kabhū mat kījiyo

jis adā kā kushta huuñ maiñ vo rahe mere hī saath

us adā ko mubtazil ai ḳhūb-rū mat kījiyo

vaqt-e-ruḳhsat dil ne itnā hī kahā ro kar ki bas

ab phir aane kī mire tū aarzū mat kījiyo

maiñ to yūñhī tum se dīvāna sā baktā huuñ kahīñ

us ke aage dostāñ ye guftugū mat kījiyo

zulf ke kūche se ho gulshan meñ guzre hai sabā

aaj vaañ jā kar guloñ ko koī bū mat kījiyo

kal ke jhagḌe meñ bhalā hai kis ke yaaro haq ba-tarf

vājibī jo ho so kahiyo merī rū mat kījiyo

vaañ 'hasan' hargiz nahīñ hai Dhiil phir jaane meñ kuchh

āshnā.ī par bharosa us kī tū mat kījiyo

mujh ko aashiq kah ke us ke ru-ba-ru mat kijiyo

dostan gar dost ho to ye kabhu mat kijiyo

jis ada ka kushta hun main wo rahe mere hi sath

us ada ko mubtazil ai KHub-ru mat kijiyo

waqt-e-ruKHsat dil ne itna hi kaha ro kar ki bas

ab phir aane ki mere tu aarzu mat kijiyo

main to yunhi tum se diwana sa bakta hun kahin

us ke aage dostan ye guftugu mat kijiyo

zulf ke kuche se ho gulshan mein guzre hai saba

aaj wan ja kar gulon ko koi bu mat kijiyo

kal ke jhagDe mein bhala hai kis ke yaro haq ba-tarf

wajibi jo ho so kahiyo meri ru mat kijiyo

wan 'hasan' hargiz nahin hai Dhil phir jaane mein kuchh

aashnai par bharosa us ki tu mat kijiyo