mujhko ye waqt waqt ko main kho ke KHush hua

mujh ko ye vaqt vaqt ko maiñ kho ke ḳhush huā

kaaTī nahīñ vo fasl jise bo ke ḳhush huā

vo rañj thā ki rañj na karnā muhāl thā

āḳhir meñ ek shaam bahut ro ke ḳhush huā

sāhab vo bū ga.ī na vo nashsha havā huā

apne ta.iiñ maiñ jām-o-subū dho ke ḳhush huā

aisī ḳhushī ke ḳhvāb se jaagā ki aaj tak

ḳhush ho ke so sakā na kabhī so ke ḳhush huā

chhānī ik umr ḳhaak ḳhushī kī talāsh meñ

honā thā rizq-e-ḳhāk mujhe ho ke ḳhush huā

'ādil' mirā libās hī ham-rañg-e-dāġh thā

kār-e-rafū kiyā na kabhī dho ke ḳhush huā

mujh ko ye waqt waqt ko main kho ke KHush hua

kaTi nahin wo fasl jise bo ke KHush hua

wo ranj tha ki ranj na karna muhaal tha

aaKHir mein ek sham bahut ro ke KHush hua

sahab wo bu gai na wo nashsha hawa hua

apne tain main jam-o-subu dho ke KHush hua

aisi KHushi ke KHwab se jaga ki aaj tak

KHush ho ke so saka na kabhi so ke KHush hua

chhani ek umr KHak KHushi ki talash mein

hona tha rizq-e-KHak mujhe ho ke KHush hua

'adil' mera libas hi ham-rang-e-dagh tha

kar-e-rafu kiya na kabhi dho ke KHush hua