mujhse saqi ne kahi raat ko kya baat ai josh

mujh se saaqī ne kahī raat ko kyā baat ai 'josh'

yaanī azdād haiñ parvarda-e-yak-zāt ai 'josh'

mast o begāna guzar jā kura-e-ḳhākī se

ye to hai rahguzar-e-sail-e-ḳhayālāt ai 'josh'

aur to aur ḳhud insān bahā jaatā hai

kitnā pur-haul hai tūfān-e-rivāyāt ai 'josh'

log kahte haiñ hijābāt nahīñ juz āyāt

kis se kahiye ki ye āyāt haiñ ḳhud zaat ai 'josh'

ahl-e-alfāz sharī.at pe miTe jaate haiñ

kis ko samjhā.ūñ mashiyyat ke ishārāt ai 'josh'

dekhiye sub.h-e-junūñ zehn meñ kab taal.e ho

aql suntā huuñ ki hai ik abadī raat ai 'josh'

quvvat-e-kal ke masāleh se aur itne bad-zan

vaa.e bar-daġhdaġha-e-ahl-e-munājāt ai 'josh'

sāġhar-e-mai hī meñ hotā hai tulū aur ġhurūb

āfrīñ bar-dil-e-rindān-e-ḳharābāt ai 'josh'

kaun mānegā ki haiñ ain-e-mashiyyat vallāh

zindagānī ke ye bigḌe hue ādāt ai 'josh'

tujh ko kyā faqr meñ rāhat hai ki shāhī meñ farāġh

tū to hai ḳhalvati-e-pīr-e-ḳharābāt ai 'josh'

mujh se saqi ne kahi raat ko kya baat ai 'josh'

yani azdad hain parwarda-e-yak-zat ai 'josh'

mast o begana guzar ja kura-e-KHaki se

ye to hai rahguzar-e-sail-e-KHayalat ai 'josh'

aur to aur KHud insan baha jata hai

kitna pur-haul hai tufan-e-riwayat ai 'josh'

log kahte hain hijabaat nahin juz aayat

kis se kahiye ki ye aayat hain KHud zat ai 'josh'

ahl-e-alfaz shariat pe miTe jate hain

kis ko samjhaun mashiyyat ke ishaaraat ai 'josh'

dekhiye subh-e-junun zehn mein kab tale ho

aql sunta hun ki hai ek abadi raat ai 'josh'

quwwat-e-kal ke masaleh se aur itne bad-zan

wae bar-daghdagha-e-ahl-e-munajat ai 'josh'

saghar-e-mai hi mein hota hai tulu aur ghurub

aafrin bar-dil-e-rindan-e-KHarabaat ai 'josh'

kaun manega ki hain ain-e-mashiyyat wallah

zindagani ke ye bigDe hue aadat ai 'josh'

tujh ko kya faqr mein rahat hai ki shahi mein faragh

tu to hai KHalwati-e-pir-e-KHarabaat ai 'josh'