mujhe baghban se gila ye hai ki chaman se be-KHabari rahi

mujhe bāġhbāñ se gila ye hai ki chaman se be-ḳhabarī rahī

ki hai naḳhl-e-gul kā to zikr kyā koī shāḳh tak na harī rahī

mirā haal dekh ke sāqiyā koī bāda-ḳhvār na pī sakā

tire jaam ḳhālī na ho sake mirī chashm-e-tar na bharī rahī

maiñ qafas ko toḌ ke kyā karūñ mujhe raat din ye ḳhayāl hai

ye bahār bhī yuuñ hī jā.egī jo yahī shikasta-parī rahī

mujhe alam tere jamāl kā na ḳhabar hai tere jalāl kī

ye kalīm jaane ki tuur par tirī kaisī jalvagarī rahī

maiñ azal se aayā to kyā milā jo maiñ jā.ūñgā to milegā kyā

mirī jab bhī dar-ba-darī rahī mirī ab bhī dar-ba-darī rahī

yahī sochtā huuñ shab-e-alam ki na aa.e vo to huā hai kyā

vahāñ jā sakī na mirī fuġhāñ ki fuġhāñ kī be-asarī rahī

shab-e-va.ada vo jo na aa sake to 'qamar' kahūñgā ye charḳh se

tire taare bhī ga.e rā.egāñ tirī chāñdnī bhī dharī rahī

mujhe baghban se gila ye hai ki chaman se be-KHabari rahi

ki hai naKHl-e-gul ka to zikr kya koi shaKH tak na hari rahi

mera haal dekh ke saqiya koi baada-KHwar na pi saka

tere jam KHali na ho sake meri chashm-e-tar na bhari rahi

main qafas ko toD ke kya karun mujhe raat din ye KHayal hai

ye bahaar bhi yun hi jaegi jo yahi shikasta-pari rahi

mujhe alam tere jamal ka na KHabar hai tere jalal ki

ye kalim jaane ki tur par teri kaisi jalwagari rahi

main azal se aaya to kya mila jo main jaunga to milega kya

meri jab bhi dar-ba-dari rahi meri ab bhi dar-ba-dari rahi

yahi sochta hun shab-e-alam ki na aae wo to hua hai kya

wahan ja saki na meri fughan ki fughan ki be-asari rahi

shab-e-wada wo jo na aa sake to 'qamar' kahunga ye charKH se

tere tare bhi gae raegan teri chandni bhi dhari rahi