mujhe chheDne ko saqi ne diya jo jam ulTa

mujhe chheḌne ko saaqī ne diyā jo jaam ulTā

to kiyā bahak ke maiñ ne use ik salām ulTā

sahar ek maash pheñkā mujhe jo dikhā ke un ne

to ishārā maiñ ne taaḌā ki hai lafz-e-shām ulTā

ye balā dhuāñ nasha hai mujhe is ghaḌī to saaqī

ki nazar paḌe hai saarā dar-o-sahn-o-bām ulTā

baḌhūñ us galī se kyūñkar ki vahāñ to mere dil ko

koī khīñchtā hai aisā ki paḌe hai gaam ulTā

dar-e-mai-kada se aa.ī mahak aisī hī maze kī

ki pichhāḌ khā girā vaañ dil-e-tishna-kām ulTā

nahīñ ab jo dete bosa to salām kyuuñ liyā thā

mujhe aap pher diije vo mirā salām ulTā

lage kahne aab maaya tujhe ham kahā kareñge

kahīñ un ke ghar se baḌh kar jo phirā ġhulām ulTā

mujhe kyuuñ na maar Daale tirī zulf ulaT ke kāfir

ki sikhā rakhā hai tū ne use lafz-e-rām ulTā

nire sīdhe-sāde ham to bhale aadmī haiñ yaaro

hameñ kaj jo samjhe so ḳhud valad-ul-harām ulTā

tū jo bātoñ meñ rukegā to ye jānūñgā ki samjhā

mire jān-o-dil ke mālik ne mirā kalām ulTā

faqat is lifāfe par hai ki ḳhat āshnā ko pahuñche

to likhā hai us ne 'inshā' ye tirā hī naam ulTā

mujhe chheDne ko saqi ne diya jo jam ulTa

to kiya bahak ke main ne use ek salam ulTa

sahar ek mash phenka mujhe jo dikha ke un ne

to ishaara main ne taDa ki hai lafz-e-sham ulTa

ye bala dhuan nasha hai mujhe is ghaDi to saqi

ki nazar paDe hai sara dar-o-sahn-o-baam ulTa

baDhun us gali se kyunkar ki wahan to mere dil ko

koi khinchta hai aisa ki paDe hai gam ulTa

dar-e-mai-kada se aai mahak aisi hi maze ki

ki pichhaD kha gira wan dil-e-tishna-kaam ulTa

nahin ab jo dete bosa to salam kyun liya tha

mujhe aap pher dije wo mera salam ulTa

lage kahne aab maya tujhe hum kaha karenge

kahin un ke ghar se baDh kar jo phira ghulam ulTa

mujhe kyun na mar Dale teri zulf ulaT ke kafir

ki sikha rakha hai tu ne use lafz-e-ram ulTa

nire sidhe-sade hum to bhale aadmi hain yaro

hamein kaj jo samjhe so KHud walad-ul-haram ulTa

tu jo baaton mein rukega to ye jaanunga ki samjha

mere jaan-o-dil ke malik ne mera kalam ulTa

faqat is lifafe par hai ki KHat aashna ko pahunche

to likha hai us ne 'insha' ye tera hi nam ulTa