mujhe do jam dena ye ishaara kar diya do hain

mujhe do jaam denā ye ishāra kar diyā do haiñ

uThā kar uñgliyāñ do maiñ ne saaqī se kahā do haiñ

abhī bhar jā.egā ik ek kar ke saarā mai-ḳhāna

abhī to bhiiḌ kam hai lā pilā de sāqiyā do haiñ

ḳhudā ko māntā hai aur koī but-parastī ko

hai manzil ek lekin rāste us ke judā do haiñ

nujūmī ne batāyā hai balā kā sāmnā mujh ko

sharārat se vo mere kaan meñ kahne lagā do haiñ

marīz-e-'ishq huuñ maiñ yā'nī ik maiñ ik mirā dil hai

nahīñ hai tīsrā koī abhī dard-āshnā do haiñ

sar-e-rāh-e-guzar ehsās-e-tanhā.ī huā mujh ko

chamak kar merī parchhā.ī ne mujh se keh diyā do haiñ

mukammal fard-e-'isyāñ pesh karnī hai qayāmat meñ

hamāre donoñ kāñdhoñ par numā.inda ḳhudā do haiñ

ilāhī manzil-e-maqsūd par maiñ ḳhair se pahuñchūñ

baḌī mushkil ye hai rāh-e-talab meñ rahnumā do haiñ

kisī ne jab kahā 'ārif' tirā sāthī nahīñ koī

mirā ham-zād bolā ek maiñ huuñ ab batā do haiñ

mujhe do jam dena ye ishaara kar diya do hain

uTha kar ungliyan do main ne saqi se kaha do hain

abhi bhar jaega ek ek kar ke sara mai-KHana

abhi to bhiD kam hai la pila de saqiya do hain

KHuda ko manta hai aur koi but-parasti ko

hai manzil ek lekin raste us ke juda do hain

nujumi ne bataya hai bala ka samna mujh ko

shararat se wo mere kan mein kahne laga do hain

mariz-e-'ishq hun main ya'ni ek main ek mera dil hai

nahin hai tisra koi abhi dard-ashna do hain

sar-e-rah-e-guzar ehsas-e-tanhai hua mujh ko

chamak kar meri parchhai ne mujh se keh diya do hain

mukammal fard-e-'isyan pesh karni hai qayamat mein

hamare donon kandhon par numainda KHuda do hain

ilahi manzil-e-maqsud par main KHair se pahunchun

baDi mushkil ye hai rah-e-talab mein rahnuma do hain

kisi ne jab kaha 'arif' tera sathi nahin koi

mera ham-zad bola ek main hun ab bata do hain