mumkin nahin ki bazm-e-tarab phir saja sakun

mumkin nahīñ ki bazm-e-tarab phir sajā sakūñ

ab ye bhī hai bahut ki tumheñ yaad aa sakūñ

ye kyā tilism hai ki tirī jalva-gāh se

nazdīk aa sakūñ na kahīñ duur jā sakūñ

zauq-e-nigāh aur bahāroñ ke darmiyāñ

parde gire haiñ vo ki na jin ko uThā sakūñ

kis tarah kar sakoge bahāroñ ko mutma.in

ahl-e-chaman jo maiñ bhī chaman meñ na aa sakūñ

terī hasīñ fazā meñ mire ai na.e vatan

aisā bhī hai koī jise apnā banā sakūñ

'āzād' sāz-e-dil pe haiñ raqsāñ vo zamzame

ḳhud sun sakūñ magar na kisī ko sunā sakūñ

mumkin nahin ki bazm-e-tarab phir saja sakun

ab ye bhi hai bahut ki tumhein yaad aa sakun

ye kya tilism hai ki teri jalwa-gah se

nazdik aa sakun na kahin dur ja sakun

zauq-e-nigah aur bahaaron ke darmiyan

parde gire hain wo ki na jin ko uTha sakun

kis tarah kar sakoge bahaaron ko mutmain

ahl-e-chaman jo main bhi chaman mein na aa sakun

teri hasin faza mein mere ai nae watan

aisa bhi hai koi jise apna bana sakun

'azad' saz-e-dil pe hain raqsan wo zamzame

KHud sun sakun magar na kisi ko suna sakun