مستقل مسافت ہے ناتمام کوشش ہے

مستقل مسافت ہے ناتمام کوشش ہے

راہ زندگی کیا ہے جائے آزمائش ہے

صبر و ضبط کی سرحد چھو چکی ہے بے زاری

خامشی کے مقتل میں سربلند خواہش ہے

پاش پاش ہونا ہے آئنہ رفاقت کا

جذبۂ حقارت سے پتھروں میں جنبش ہے

خواب کے جنازے پر نوحہ خواں ہیں تعبیریں

دامن ندامت پر آنسوؤں کی پرسش ہے

روز و شب بدلتے ہیں زاویے مقدر کے

ہاتھ کی لکیروں میں اشتہار گردش ہے

آنکھ آنکھ خوں نابی تار تار دامانی

جسم جسم زخموں کی ہر طرف نمائش ہے

اب رہ محبت پر ہر قدم ہے مستحکم

رہنمائے دل سالمؔ حوصلوں کی یورش ہے