na āsmān hai sākit na dil Thahartā hai
zamāna naam guzarne kā hai guzartā hai
vo merī jaan kā dushman sahī magar sayyād
mirī kahī huī bātoñ pe kaan dhartā hai
hamīñ haiñ vo jo umīd-e-fanā pe jiite haiñ
zamāna zindagī-e-be-baqā pe martā hai
abhī abhī dar-e-zindāñ pe kaun kahtā thā
udhar se haT ke chalo koī naale kartā hai
vahī sukūt se ik umr kāTne vaalā
jo sunñe vaalā ho koī to kah guzartā hai
harīf bazm meñ chheḌā kareñ magar 'sāqib'
vo dil jo baiTh gayā ho kahīñ ubhartā hai
na aasman hai sakit na dil Thaharta hai
zamana nam guzarne ka hai guzarta hai
wo meri jaan ka dushman sahi magar sayyaad
meri kahi hui baaton pe kan dharta hai
hamin hain wo jo umid-e-fana pe jite hain
zamana zindagi-e-be-baqa pe marta hai
abhi abhi dar-e-zindan pe kaun kahta tha
udhar se haT ke chalo koi nale karta hai
wahi sukut se ek umr kaTne wala
jo sunne wala ho koi to kah guzarta hai
harif bazm mein chheDa karen magar 'saqib'
wo dil jo baiTh gaya ho kahin ubharta hai
Source:
Rooh-e-Ghazal,Pachas Sala Intekhab (Pg. 66)
-
- Edition: 1993
- Publisher: Anjuman-e-Rooh-e-Adab, Allahabad
- Year of Publication: 1993
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
