na āsmāñ kī kahānī na vaañ kā qissa likh
uThā davāt o qalam aadmī kā chehra likh
hazār shor sameTe hue hai merā vajūd
mire vajūd ke sahrā ko chashm-e-dariyā likh
binā-e-mausam-e-ġham-hā-e-zāt hai duniyā
ise tū rashk-e-iram likh ki shāḳh-e-tūbā likh
vo nuur phailā vo phūTī koī kiran taaza
tamām umr añdherā hī thā na aisā likh
jo maut pī gayā ik jām-e-ambagīñ kī tarah
use tū maut kī manzil kā ik masīhā likh
vo ajnabī to zarā ajnabī nahīñ lagtā
use to ġhair na kah koī hai vo apnā likh
bichhaḌ gayā hai to kyā saath bhī to thā barsoñ
'zahīr' ruuh o badan kā use tū rishta likh
na aasman ki kahani na wan ka qissa likh
uTha dawat o qalam aadmi ka chehra likh
hazar shor sameTe hue hai mera wajud
mere wajud ke sahra ko chashm-e-dariya likh
bina-e-mausam-e-gham-ha-e-zat hai duniya
ise tu rashk-e-iram likh ki shaKH-e-tuba likh
wo nur phaila wo phuTi koi kiran taza
tamam umr andhera hi tha na aisa likh
jo maut pi gaya ek jam-e-ambagin ki tarah
use tu maut ki manzil ka ek masiha likh
wo ajnabi to zara ajnabi nahin lagta
use to ghair na kah koi hai wo apna likh
bichhaD gaya hai to kya sath bhi to tha barson
'zahir' ruh o badan ka use tu rishta likh
Source:
Jab Zaminon Se Shajar Ugtey Hain (Pg. 106)
-
Author:
Ali Zaheer
-
- Edition: 1994
- Publisher: Educational Publishing House
- Year of Publication: 1994
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.