na aasman se na dushman ke zor o zar se hua

na āsmāñ se na dushman ke zor o zar se huā

ye mojaza to mire dast-e-be-hunar se huā

qadam uThā hai to paañv tale zamīñ hī nahīñ

safar kā ranj hameñ ḳhvāhish-e-safar se huā

maiñ bhiig bhiig gayā aarzū kī bārish meñ

vo aks aks meñ taqsīm chashm-e-tar se huā

siyāhī shab kī na chehroñ pe aa ga.ī ho kahīñ

sahar kā ḳhauf hameñ ā.īnoñ ke Dar se huā

koī chale to zamīñ saath saath chaltī hai

ye raaz ham pe ayaañ gard-e-rahguzar se huā

tire badan kī mahak hī na thī to kyā rukte

guzar hamārā ka.ī baar yuuñ to ghar se huā

kahāñ pe so.e the 'amjad' kahāñ khulīñ āñkheñ

gumāñ qafas kā hameñ apne bām-o-dar se huā

na aasman se na dushman ke zor o zar se hua

ye mojaza to mere dast-e-be-hunar se hua

qadam uTha hai to panw tale zamin hi nahin

safar ka ranj hamein KHwahish-e-safar se hua

main bhig bhig gaya aarzu ki barish mein

wo aks aks mein taqsim chashm-e-tar se hua

siyahi shab ki na chehron pe aa gai ho kahin

sahar ka KHauf hamein aainon ke Dar se hua

koi chale to zamin sath sath chalti hai

ye raaz hum pe ayan gard-e-rahguzar se hua

tere badan ki mahak hi na thi to kya rukte

guzar hamara kai bar yun to ghar se hua

kahan pe soe the 'amjad' kahan khulin aankhen

guman qafas ka hamein apne baam-o-dar se hua