na barg hun main gul ka na lale ka shajar hun

na barg huuñ maiñ gul kā na laale kā shajar huuñ

maiñ laḳht-e-dil-e-rīsh huuñ aur dāġh-e-jigar huuñ

huuñ dair meñ na ka.abe meñ na dil hī meñ apne

kyā jānoñ tajassus meñ tirī aah kidhar huuñ

paidā hue aur jaate rahe saikḌoñ mujh se

ātish-kada-e-dahr meñ ik maiñ bhī sharar huuñ

na ziist kā haz hai na mujhe maut kā ārām

huuñ naza.a meñ jaise ki idhar huuñ na udhar huuñ

vaañ dhyān kabhī tujh ko guzartā nahīñ merā

maiñ huuñ ki tirī yaad meñ yaañ aaTh pahar huuñ

na duud huuñ mujmir kā na maiñ sham.a kā sho.ala

maiñ nāla-e-shab-gīr huuñ aur āh-e-sahar huuñ

ḳhālī nahīñ mujh se haram-o-dair-o-dil-o-chashm

maiñ maz.har-e-haq huuñ ki jidhar dekho tidhar huuñ

paatā hī nahīñ raah kisī dil meñ ilāhī

maiñ kis dil-e-nākām kī aahoñ kā asar huuñ

na shīsha-e-mai huuñ na 'hasan' sāġhar-e-labrez

maiñ ik dil-e-pur-dard huuñ aur dīda-e-tar huuñ

na barg hun main gul ka na lale ka shajar hun

main laKHt-e-dil-e-rish hun aur dagh-e-jigar hun

hun dair mein na kabe mein na dil hi mein apne

kya jaanon tajassus mein teri aah kidhar hun

paida hue aur jate rahe saikDon mujh se

aatish-kada-e-dahr mein ek main bhi sharar hun

na zist ka haz hai na mujhe maut ka aaram

hun naza mein jaise ki idhar hun na udhar hun

wan dhyan kabhi tujh ko guzarta nahin mera

main hun ki teri yaad mein yan aaTh pahar hun

na dud hun mujmir ka na main shama ka shoala

main nala-e-shab-gir hun aur aah-e-sahar hun

KHali nahin mujh se haram-o-dair-o-dil-o-chashm

main mazhar-e-haq hun ki jidhar dekho tidhar hun

pata hi nahin rah kisi dil mein ilahi

main kis dil-e-nakaam ki aahon ka asar hun

na shisha-e-mai hun na 'hasan' saghar-e-labrez

main ek dil-e-pur-dard hun aur dida-e-tar hun