na jaan-bazon ka majma tha na mushtaqon ka mela tha

na jāñ-bāzoñ kā majmā thā na mushtāqoñ kā melā thā

ḳhudā jaane kahāñ martā thā maiñ jab tū akelā thā

gharauñdā yuuñ khaḌā to kar liyā hai ārzūoñ kā

tamāshā hai jo vo kah deñ ki maiñ ik khel khelā thā

bahut saste chhuTe ai maut bāzār-e-mohabbat meñ

ye saudā vo hai jis meñ kyā kaheñ kyā kyā jhamelā thā

agar taqdīr meñ hotā to ik din paar bhī lagtā

ye dariyā jhelne ko yuuñ to ai dil ḳhuub jhelā thā

hamesha hasrat-e-dīdār pe dil ne qanā.at kī

baḌe dar kā mujāvir thā baḌe murshid kā chelā thā

kahāñ dil aur fusūn-e-ishq kī ghāteñ kahāñ yā rab

na paḌtā thā balāoñ meñ abhī kam-baḳht anīlā thā

jahāñ chāhe lage jis dil ko chāhe chuur kar Daale

zabāñ se pheñk maarā baat thī nāseh ki Dhelā thā

tamāsha-gāh-e-duniyā meñ batā.ūñ kyā ummīdoñ kī

tan-e-tanhā thā maiñ ai 'shād' aur reloñ pe relā thā

na jaan-bazon ka majma tha na mushtaqon ka mela tha

KHuda jaane kahan marta tha main jab tu akela tha

gharaunda yun khaDa to kar liya hai aarzuon ka

tamasha hai jo wo kah den ki main ek khel khela tha

bahut saste chhuTe ai maut bazar-e-mohabbat mein

ye sauda wo hai jis mein kya kahen kya kya jhamela tha

agar taqdir mein hota to ek din par bhi lagta

ye dariya jhelne ko yun to ai dil KHub jhela tha

hamesha hasrat-e-didar pe dil ne qanaat ki

baDe dar ka mujawir tha baDe murshid ka chela tha

kahan dil aur fusun-e-ishq ki ghaten kahan ya rab

na paDta tha balaon mein abhi kam-baKHt anila tha

jahan chahe lage jis dil ko chahe chur kar Dale

zaban se phenk mara baat thi naseh ki Dhela tha

tamasha-gah-e-duniya mein bataun kya ummidon ki

tan-e-tanha tha main ai 'shad' aur relon pe rela tha