na jaane kis ne kaha tha bhaTakte aahu se

na jaane kis ne kahā thā bhaTakte aahū se

mahak rahā hai ye jañgal tirī hī ḳhushbū se

jhulas rahā thā ka.ī din se aañkh kā sahrā

ye dasht ho gayā sairāb ek aañsū se

vo hijr thā ki añdherā sā chhā gayā dil meñ

vo yaad thī ki chamakne lage the jugnū se

mire liye to vo dīvān-e-'mīr' jaisā thā

huā thā nam kabhī kāġhaz jo pahle aañsū se

to aañkh bhar ke un āñkhoñ meñ dekhnā hogā

to hogā aise hī jaadū kā toḌ jaadū se

havā kā zor hai kyā dhuup kī hai kyā shiddat

ki āñsuoñ kī duā.eñ bañdhī hai baazū se

havā ke lams ne mahkā diyā mujhe 'fārūq'

havā ne haath rachāeñ haiñ kis kī ḳhushbū se

na jaane kis ne kaha tha bhaTakte aahu se

mahak raha hai ye jangal teri hi KHushbu se

jhulas raha tha kai din se aankh ka sahra

ye dasht ho gaya sairab ek aansu se

wo hijr tha ki andhera sa chha gaya dil mein

wo yaad thi ki chamakne lage the jugnu se

mere liye to wo diwan-e-'mir' jaisa tha

hua tha nam kabhi kaghaz jo pahle aansu se

to aankh bhar ke un aankhon mein dekhna hoga

to hoga aise hi jadu ka toD jadu se

hawa ka zor hai kya dhup ki hai kya shiddat

ki aansuon ki duaen bandhi hai bazu se

hawa ke lams ne mahka diya mujhe 'faruq'

hawa ne hath rachaen hain kis ki KHushbu se