na jab dekhi gai meri taDap meri pareshani

na jab dekhī ga.ī merī taḌap merī pareshānī

pakaḌ kar un ko jhoñTe khīñch laayā shauq-e-uryānī

libās ījād kar aisā koī ai aql-e-insānī

ki tan-poshī kī tan-poshī ho uryānī kī uryānī

ma.āz-allāh vo kāfir-adā kā husn-e-pinhānī

ki ab ḳhatre meñ hai har ik musalmāñ kī musalmānī

batā detī hai baḌh kar un ke jalvoñ kī farāvānī

ki ghar se be-hijābāna nikal aa.ī hai muġhlānī

ma.āz-allāh janāb-e-shaiḳh kā ye josh-e-īmānī

samajhte haiñ butoñ ke hukm ko āyāt-e-qur.ānī

jise dekho rakhe hai sar pe apne tāj-e-sultānī

hañsī ThaTThā samajh rakkhā hai har ik ne jahāñbānī

tamannā.eñ mirī pāmāl yuuñ kartā hai vo zālim

kisī mauza.a meñ jaise khet jote koī dahqānī

har ik kī ḳhātireñ hasb-e-marātib hoñgī dozaḳh meñ

vo nāseh hoñ ki zāhid hoñ ki mullā hoñ ki mullānī

ḳhudā mahfūz rakkhe fitrat-e-insāñ se aalam meñ

muaddab ho ke kahtā hai jise shaitāñ bhī ustānī

sadā hirs-o-havas se duur rahnā chāhiye hamdam

ye donoñ haiñ baḌī fitna jeThānī hoñ ki devrānī

ba-qadr-e-zauq takmīl-e-tamannā 'shauq' kyā hotī

ki ham ne aurteñ pā.īñ kabhī andhī kabhī kaanī

haiñ yaksāñ zāhid-e-kam-aql hoñ yā nāseh-e-nādāñ

khilaune sab barābar haiñ vo chīnī hoñ ki jāpānī

vo nāseh hoñ ki vaa.iz hoñ ki qaa.id hoñ ki rahbar hoñ

inhīñ logoñ se phailī hai jahāñ meñ nasl-e-insānī

jafā.eñ ham pe hotī haiñ karam ġhairoñ pe hotā hai

yahāñ girte haiñ ole aur vahāñ barsāte haiñ paanī

mujhe barbād kar ke dost pachhtāne se kyā hāsil

churā kaare kunad aaqil ki baaz aabid pashemānī

zarā hushiyār rahnā rahbaro is hirs-e-duniyā se

na luḌhkā de tumheñ dozaḳh meñ ye shaitān kī naanī

na jab dekhi gai meri taDap meri pareshani

pakaD kar un ko jhonTe khinch laya shauq-e-uryani

libas ijad kar aisa koi ai aql-e-insani

ki tan-poshi ki tan-poshi ho uryani ki uryani

maaz-allah wo kafir-ada ka husn-e-pinhani

ki ab KHatre mein hai har ek musalman ki musalmani

bata deti hai baDh kar un ke jalwon ki farawani

ki ghar se be-hijabana nikal aai hai mughlani

maaz-allah janab-e-shaiKH ka ye josh-e-imani

samajhte hain buton ke hukm ko aayat-e-qurani

jise dekho rakhe hai sar pe apne taj-e-sultani

hansi ThaTTha samajh rakkha hai har ek ne jahanbani

tamannaen meri pamal yun karta hai wo zalim

kisi mauza mein jaise khet jote koi dahqani

har ek ki KHatiren hasb-e-maraatib hongi dozaKH mein

wo naseh hon ki zahid hon ki mulla hon ki mullani

KHuda mahfuz rakkhe fitrat-e-insan se aalam mein

muaddab ho ke kahta hai jise shaitan bhi ustani

sada hirs-o-hawas se dur rahna chahiye hamdam

ye donon hain baDi fitna jeThani hon ki dewrani

ba-qadr-e-zauq takmil-e-tamanna 'shauq' kya hoti

ki hum ne aurten pain kabhi andhi kabhi kani

hain yaksan zahid-e-kam-aql hon ya naseh-e-nadan

khilaune sab barabar hain wo chini hon ki japani

wo naseh hon ki waiz hon ki qaid hon ki rahbar hon

inhin logon se phaili hai jahan mein nasl-e-insani

jafaen hum pe hoti hain karam ghairon pe hota hai

yahan girte hain ole aur wahan barsate hain pani

mujhe barbaad kar ke dost pachhtane se kya hasil

chura kare kunad aaqil ki baz aabid pashemani

zara hushiyar rahna rahbaro is hirs-e-duniya se

na luDhka de tumhein dozaKH mein ye shaitan ki nani